主页 > N轻生活 >复古耳扩配件全齐Shure SHA900 >

复古耳扩配件全齐Shure SHA900

2020-06-28

唔少耳机友选择耳扩等配件时，会倾向用返同一品牌，夹返声之余，成个total look亦唔会落差太大。近来就轮到Shure「终于推出」旗下首款便携耳扩SHA900，当中用上复古收音机嘅外形，尚算衬得返唔同风格嘅耳机，但特别之处是产品跟机配件特多，无论你用电脑定手机听歌，配搭贵价SRH1540、SE535，以至入门级SE215耳机，都能放胆细听。

用得Shure产品嘅用家，有唔少都係长期粉丝，所以品牌呢刻先推出SHA900耳扩，可说迟到好过无到，而且用上复古外形，都算得上襟睇；反而係镀铝合金外殻令机身重量增至182g，再搭埋耳机、手机／播放器使用，就比较难以轻装带出街听歌。

SHA900设有数码及模拟处理系统，当用家使用后者时，机身会自动熄晒所有digital组件，为用家带来全analog讯号处理。盒面虽有Hi-Res Audio认证，但最高取样频率只有24-bit/96kHz，某程度上係跑输大市。不过咁，讲到方便性，呢款耳扩係冇得输嘅，跟机之USB连接线可驳齐iOS、Android及电脑等装置，基本上用家唔介意用原装线嘅话，已经可以用尽配件接驳听歌。只係以USB驳上手机或电脑后，耳扩便会自动充电，所以个人建议先关掉这功能，否则用手机听歌嘅话，真心令机身超热同好快冇电。

其实规格只係数字游戏，用家更关心嘅係声音表现。今次分别以Sony Xperia Z3+、iPhone 6s及桌面电脑，再先后连上Shure SRH1540密闭式耳机及UE Reference Monitor鉴听耳机，试听张学友〈李香兰〉、王菲〈多得他〉两首同样讲求声音层次感及分析力嘅歌曲。喺唔同装置及耳机配搭下，耳扩都备有丰富细节，就算使用唔同装置收听，对其表现影响亦不大。相反耳机夹唔夹声会几影响听感，例如对比「听咩出咩」嘅UE Reference Monitor，以及声底偏柔之SRH1540于〈李香兰〉一曲嘅声音表现，会明显觉得前者更能显出学友歌声上嘅动感，后者听落会soft咗，所以夹返Shure耳机细听，可能相对地会以SE535、SE864一类声底较具动态嘅款式较match。